کیرالا کی سیاسی تاریخ میں ایک اہم اور غیر معمولی پیش رفت کے طور پر بھارتیہ جنتا پارٹی (بی جے پی) نے ریاست میں پہلی بار کسی میونسپل کارپوریشن میں کامیابی حاصل کر لی ہے۔ بی جے پی کے ریاستی سکریٹری اور کوڈونگنور وارڈ کے کونسلر وی وی راجیش جمعہ کے روز ترواننت پورم میونسپل کارپوریشن کے میئر منتخب ہو گئے۔
101 رکنی کارپوریشن میں ہونے والے انتخاب میں وی وی راجیش نے 51 ووٹ حاصل کیے۔ انہیں بی جے پی کے 50 کونسلروں کے علاوہ ایک آزاد رکن کی حمایت بھی حاصل رہی، جس کے نتیجے میں یہ تاریخی کامیابی ممکن ہو سکی۔
یہ کامیابی اس لیے بھی غیر معمولی سمجھی جا رہی ہے کہ کیرالا میں بلدیاتی ادارے طویل عرصے سے بائیں بازو کی لیفٹ ڈیموکریٹک فرنٹ (LDF) اور یونائیٹڈ ڈیموکریٹک فرنٹ (UDF) کے زیرِ اثر رہے ہیں۔
میئر کے عہدے کے لیے ہونے والے مقابلے میں یو ڈی ایف کے امیدوار کے ایس سبریناتھن کو 17 ووٹ ملے، جبکہ ایل ڈی ایف کے امیدوار آر پی شواجی نے 29 ووٹ حاصل کیے۔ بعد ازاں جانچ کے بعد یو ڈی ایف کے حق میں ڈالے گئے دو ووٹوں کو درست قرار دیا گیا۔سیاسی مبصرین کے مطابق وی وی راجیش کی کامیابی کیرالا میں بی جے پی کے لیے ایک اہم سنگِ میل ہے، جو آنے والے بلدیاتی اور اسمبلی انتخابات میں ریاست کی سیاست کا رخ بدل سکتی ہے۔
Leave a Reply